غزل
پہلے تو جتاتا تھا وہی پیار زیادہ
کرتا ہے ہر اک بات پہ تکرار زیادہ
جس شخص کے ہوں گے جہاں دلدار زیادہ
ہاں اس کے وہاں ہوں گے طرفدار زیادہ
سچ پوچھو تو نادان ہے وہ سب کی نظر میں
خود کو ہی سمجھتا ہے سمجھدار زیادہ
انسان کا انسان ہی خوں چوس رہا ہے
اب سرخ نظر آتے ہیں اخبار زیادہ
بکنے پہ تلا تھا تو کوئی بھی نہیں پوچھا
بکتے ہی مرے آئے خریدار زیادہ
جو صاحب ثروت ہیں انہیں فکر نہیں ہے
حالات سے مجبور ہیں لاچار زیادہ
اس دور میں رہتے ہیں کئی بھیس میں اجمل
اندر سے ٹٹولیں تو ہیں مکار زیادہ
محمد جمال اجمل
کوئی تبصرے نہیں:
ایک تبصرہ شائع کریں