جب تلک خود میں بہاروں کا سماں ہوتا ہے
تب تلک جان لو ہر عزم جواں ہوتا ہے
اس طرح جھوٹ کو سچ کہنے کی کوشش نہ کرو
بن لگے آگ کہیں یار دھواں ہوتا ہے
ہم نے یہ سوچ کے اک زخم دیا ہے اس کو
نہ لگے چوٹ تو احساس کہاں ہوتا ہے
یہ تو وہ درد ہے جو دل میں سمو لیتے ہیں
"قصہِ غم کہاں لفظوں میں بیاں ہوتا ہے"
کب کہاں کون سے صحرا میں بھٹک جائے وہ
شاعروں کا تو الگ ایک جہاں ہوتا ہے
سوچتا ہوں جو کبھی درد دیا تھا اس نے
آنکھ سے اشک نہیں خون رواں ہوتا ہے
اس طرح اور کہیں ہوتا ہے شاید اجمل
آج کے دور میں جو میرے یہاں ہوتا ہے
محمد جمال اجمل
کوئی تبصرے نہیں:
ایک تبصرہ شائع کریں